Musikaldirako Sarrerak…
Sarrerak lortzeko hainbat aukera daude eskuragarri: banakako sarrerak kontzertu bakoitzerako; hainbat abono mota gau klasiko eta modernoetarako; eta bazkide egiteko aukera.
-
Kontzertu bakoitzerako sarrerak erosteko aukera duzu. Scroll egin behekaldera ikusteko.
-
Hiru abono mota dituzu aukeran: gau klasikoetarako abonoa, gau modernoetarako abonoa eta abono konpletoa. Abonoa erosiz banaka sarrerak erosiz baino prezio hobea lor dezakezu! Klik egin hemen abonoak ikusteko.
-
Itxas Soinua musikaldia lagundu nahi baduzu, orain bazkide egiteko aukera duzu! Bazkideek abantaila bereziak dituzte. Ezagutu itzazu bazkidetza orrian.
Gau Klasikoak
Andra Mariaren Zeruratzearen Basilikan
Uzt. 18 – 20:00
XABIER ZEBERIO – “Pause”
[Gau Klasikoa]
Intimista, pausatua eta barea, sakona eta era berean lebitatzailea, emozioen ertzak kilimatu eta leuntzen dituen lan biribila da Pause. Atmosferak sortzen dituzten diskoez ari garenean (soinu bandekin gertatu ohi da sarri), amaitu gabe dagoen alboko melodiaren susmoa piztu ohi zaigu usu: aditz laguntzailea besterik ez ote da musika? Kasu bakan batzuetan, aldiz, delako atmosfera hori urrundu egiten da atrezzo soiletik eta gure arretaren erdigunean ipintzen da: lanbroz ehundutako animo egoera horiek inguratu eta gatibatu egiten gaituzte oharkabean, eta jada ez dugu giro horretatik irten nahi. Horixe da Xabier Zeberioren lan honen kasua; goiz-albako esnatze baten lurruna, penarik gabeko malenkonia, aireportu mortuko denbora esekia. Datorren egunari aurre egin edo joandakoari buruz hausnartzeko tenorea dakarten doinuak. Trikimailurik gabeko zirrara. Iñar Sastreren pianoak seinalatu eta askatu egin ditu kostaldeko paisajearen korapiloak.
Prezioa: 10€
Uzt. 19 – 20:00
GANBARA ABESBATZA - “IN PERPÉTUUM”
[Gau Klasikoa]
Oñatiko Ganbara Abesbatza 1994an 12 gaztek sortutako ahots nahasien abesbatza da. Urtez urte, ilusio berarekin, taldea haziz joan da, egun, Aitor Biain Bidarteren zuzendaritzapean, 30 pertsona inguruko taldea osatu arte. Errepertorioan mota eta garai guztietako lanak ikus ditzakegu: polifonia, folklorea, gospel, espiritualak, … euskal folkloreak eta gaur egungo konposatzaileek abesbatzaren egitarauetan zati garrantzitsua osatuz.
Prezioa: 10€
Uzt. 20 – 20:00
IBERIAN BRASS ENSEMBLE
[Gau Klasikoa]
Iberian Brass Ensemble haize-metalezko tresnez osatutako ganbera-talde bat da, Kastilla eta Leongo Goi Mailako Musika Kontserbatorioan, Salamancan, ikasten ari zirela elkar ezagutu eta prestakuntza jaso zuten musikari gazteek osatua. Taldea lau tronpetak, bi tronpak, hiru tronboik eta tuba batek osatzen dute. Gainera, esan beharra dago Xabi Gabiola fliskorno-jole Lekittarra ere taldeko kidea dela.
Bere kideen maila musikalari esker, taldeak aukera zabala eskaintzen du kontzertuetan. Bere errepertorioak musika barrokoa, klasikoa eta espainiarra hartzen ditu barne, baita jazz eta folklore ere, konpositore handien orkestrazioak eta talde honetarako espresuki sortutako lanak uztartuz.
Prezioa: 12€
Gau Modernoak
Ikusgarri Zinema Aretoan
Uzt. 24 – 20:00
GERALDINE TRÍO – “Urdina”
[Gau Modernoa]
Urdina. Itsasoa eta zerua. Bizia eta barea. Musikari hauek, bossa novaren zale amorratuak hiruak ere, musika-estilo horren harmonia, melodia eta erritmo harrigarri eta aberatsak dakartzate. Ahotsa, gitarra eta perkusioaren soinu minimalistak berebiziko giroa sortzen du, eta bizipozaren eta malenkoniaren arteko bidaian murgiltzen gaitu. Geraldineren ahots goxoak Ricardo Urrutiaren gitarrarekin bat egiten du, instrumentu bakar bat bezala funtzionatuz. Aitor Bravok erritmo brasildarrak gehituko ditu.
Proposamen honek, euskarazko, ingelesezko eta portugesezko abestiak bilduta, jazz eta bossa nova estandarrak ikuspegi eguneratu eta berri-berritik irudikatzera gonbidatzen gaitu, paregabeko fusio berritzailea lortuz. Urdina. Ura eta haizea. Iraganeko konpositoreengan inspiratuta eta orainaldira ekarritako proiektua.
Prezioa: 8€
Uzt. 25 – 20:00
FEMM + Band – “Aquatic Vocal Jazz”
[Gau Modernoa]
FEMMM ahots-laborategi bat da, adierazpen artistikoaren beharretik eta musikaren industrian emakumezko eta ahots erreferenteen beharretik sortutako proiektua. Proiektu honen musika harmonien eta koloreen bilaketa baten laburpena da, pertsonalki “sonoritate akuatikoa” deitzea gustatzen zaiena.
Aipatzekoa da taldea, denbora gutxian, egungo jazzgune garrantzitsuen kartelen parte izan dela: Donostiako Jazzaldia, Getxoko Jazz Festibala, Gasteizko Jazz Jaialdia, Udazabal zikloa Arrasaten, Kutxa Kultur aretoa Tabakalera Donostian, Harresi aretoa Agurainen... Alazne López, Nahia Valle, Dánae Riaño eta Maider Bigurik osatzen dute taldearen front line-a, Iker Hernandez (baterian), Cristina Pascual (baxuan) eta Donny López-ek (pianoan) lagunduta.